Romans 12
Nono gaklene boll boll God opa mal embe aumbon
1Embe yei pille, na agana abana ▼▼Kandja Grik ge “agana kambono” bolo wori pai.
kambono ye mor ge, na kandja dje ye aundo, God ye moi al wandill kaima golo awi pille, ye yenekne gaklene God opa mal embe aune! Ye opa mal embe auneke, una kog kau to golo opa awinj mal, ge man. Ye gun molo opa aune mal embe moye. God opa kane wopake ye aundo mal ge ye embe moyeke, une kane wopake piya. Ye embe yene ge, ye God pille lotu singare pai mal yene. 2Makimb al una singare yenj mal ge ye nayene. Ye djineke, God ye nomane gun aundaka, ye singare gun yene. Ye nomane gun pandaka, God ye singare gun yene dje piya mal ge ye pille kune yene. Singare wopake paro ge ne, singare du dje, God wopake kando mal ge ye kane kune yene.God nono nomane aundo mal pille kogo yembon
3God na wandill golo awi al ge, na kandja embe dje ye aundo, ye yenekne mor mal piye, na pla moro we dje napiye. Na pillgi paro mal God na awi paro dje piye. 4Nono gaklene taimane paro ba, kakene aglene ne, wal kerker paro ge, yenekne kogene paro mal yenj. 5Yenj mal ge Krais gakle embe paro. Nono Krais boll aike mormon pille, yene kake agle ne, wal kerker paro ge nono mormon. Alla nono taimantaiman dje mormon ge, nono kogone awi mal yenmon. Ta kogo ye er wekle punda ta are punda ge man, kogo ye wo er taimane pine.6God wandill golo awi al ge, nono taimantaiman dje yembene kayekaye awi paro. God ta aunda ge, une kandja propet dje una aunda. Awi dal, une pillgi panda mal kandja dje una aunda, kandja ta man. 7God ta aunda ge, une po God wombaye pakto aunda. Awi dal, une pak wopake to aunda mal. Ta aunda ge, une po una kandja wopake beke aunda. Awi dal, une beke wopake ye aunda mal. 8Ta aunda ge, una kumbene wopake yenda dje pille, kandja wopake dje una aunda. Awi dal, kogo ge wopake yenda mal. Ta aunda ge, una wal nayero al une wal awo awo yenda. Awi dal, wal merke aunda mal. God ta aunda ge, une iwa kerman moya. Moi dal, una kantau wopake yenda mal. Ta aunda ge, una wandill golo, amblo pille dje aunda. Awi dal, une wo pille kogo ge yenda mal.
Nono agane abane kane wopake ye aumbon
9Ye una boll kane wopake ye aune ge, ye kaima yene, kende nayene. Singare ke mambine ge, ke kane kerne. Alla, singare wopake paro ge ye amblo gi djine. 10Age age soka yenekne kane wopake kaima yenmell mal ye embe yene. Ni agan pille pla ye aumben, ni nenem molo kal woro mopen. 11Ye kogke nayene, God Murble ye boll moyaka, ye aglo gi dje molo Iwa Kerman kogoye yene.12God ye wopake ye aunda dje kui ye mor ge, ye wo pille kui ye moye. Ye imb kakne ge, ye kiye dje molo kakne. Ye kamang ege ege yene, nakerne. 13God unakye wal ta nayenda ge, ye pak to aune. Una gulke ta woi dal, ye i numog woro kane wopake ye aune.
14Una wo ye ke ye aune ge, ye kamang yeneke, God wal wopake i ga aunda, God tonda dje kamang nayene. 15Una wo piye ge, ye kambono boll aike wo piye. Alla, una kimb yene ge, ye kambono boll aike kimb yene. 16Ye una boll aike moye ge, ye singare kune panda mal moye. Na iwa kerman moro we nadjine, kogo ke wopake ta panda ge, ye aike yene! Na iwa pla moro we nadjine!
17Una wo ye ye ke ye awi dal, ye ye ke ye yem woro naune. Singare una porapora wopake kaninj singare ge, ye embe eri yene.
18Ye una boll kunda nonga yembon dje nayene, ye kumbene taimane panda mopon dje yene. 19Agana kambono, ye mor al una ta wo ye to dji dal, ye to yem woro naune. Ge kandja Baibel al bolo wori pai ge embe djindo,
To yem woro auno ge na boll yero, na nanam awo yem woro auno we dji. b
20Alla kunda yem una ta koll tonda ge, ye kwa gale aune. Une nu nano dje piya ge, ye nu kolo aune. Ye singare embe yene ge, kunda yem una kane ngandjill goya, na singare ke kaima yell we dje piya. c 21Una wo singare ke yene ye to yem worne ba, ye yembe ye molo singare wopake ye awo yem wori dal, ye wekle pine, kambono are kaima wone.
Copyright information for
GAM